|
Nus essan oriunds dalla Tiaratudestga ed igl unviern bardigliein nus da Tumein a Trin. Tochen uss essan nus adina mo vegni en contact cun il romontsch entras amitgs, p.ex. a caschun dad ina fiasta da Sontgaclau. Igl onn proxim entscheiva nossa feglia la scola e entras nossa midada da casa vegn era nies fegl enzacu en contact cun il romontsch.
Ultra da quei essan nus fetg interessai da s'integrar bein cheu en Svizra ed emprendein en general fetg bugen lungatgs, era pervia dalla professiun. Nus lein era saver "tener pass" cun nos affons. Il cuors per famiglias a casa ei per il mument la sligiaziun ideala per saver cumbinar la professiun, il temps liber, la famiglia e la furmaziun supplementara.
Il cuors fa grond plascher. Dunna Capatt (la menadra dil cuors) e nus sezs sedein fetg gronda breigia da far endretg a tuts. Nus discutein mintga pass d'instrucziun che duei vegnir adattaus als basegns da mintgin. Nus exprimin nos giavischs e dunna Capatt fa sinaquei propostas.
Quei cuors savein nus mo recumandar, cunquei ch'el s'adattescha als basegns individuals dallas persunas ch'emprendan ed alla situaziun familiara (affons pigns, ei drova buc enzatgi che pertgira ils pops, eav.). Quei ei in enorm avantatg visavi ils auters cuors structurai cun claras directivas. Metodas d'emprender visualas e cun giugs, sco quei ch'ellas vegnan applicadas tier ils affons, ein dil reminent era fetg adattadas per ils carschi.
|
